MAZISHI YA MWANAMUZIKI MKONGWE, MAREHEMU SHEM IBRAHIM KARENGA KATIKA MAKABURI YA KISUTU JIJINI DAR LEO

Baadhi ya wadau wa muziki wakiwa wamebeba jeneza lililokuwa na mwili wa mwanamuziki mkongwe wa bendi ya Tabora Jazz, marehem...

Baadhi ya wadau wa muziki wakiwa wamebeba jeneza lililokuwa na mwili wa mwanamuziki mkongwe wa bendi ya Tabora Jazz, marehemu Shem Karenga wakati wa maziko yake kwenye makaburi ya Kisutu, jijini Dar es Salaam leo alasiri.

(Chini na juu) Ni taswira mbalimbali za wanamuziki, marafiki ndugu na jamaa waliojitokeza kumzika gwiji huyo wa muziki aliyezikwa leo jijini Dar es Salaam.

Ankali Michuzi alipokutana na mdau Ali Choki kwenye maziko hayo.

(Picha kwa hisani ya Globu ya Jamii )
***************

THE UNITED REPUBLIC OF TANZANIA

DIRECTORATE OF PRESIDENTIAL COMMUNICATIONS

Telephone: 255-22-2114512, 2116898

E-mail: ikulucommpress@googlemail.com

Website : www.ikulu.go.tz

Fax: 255-22-2113425

PRESIDENT’S OFFICE,

      STATE HOUSE,

              1 BARACK OBAMA ROAD,

11400 DAR ES SALAAM.

Tanzania.

TAARIFA KWA VYOMBO VYA HABARI

Rais wa Jamhuri ya Muungano wa Tanzania, Mheshimiwa Dkt. Jakaya Mrisho Kikwete amemtumia salamu za rambirambi Waziri wa Habari, Vijana Utamaduni na Michezo, Mheshimiwa Dkt. Fenella Mukangara kuomboleza kifo cha mwanamuziki mkongwe, Shem Ibrahim Karenga kilichotokea tarehe 15 Desemba, 2014 katika Hospitali ya Amana jijini Dar es Salaam alikokuwa amepelekwa kwa matibabu ya ugonjwa wa shinikizo la damu.

Enzi za uhai wake, Marehemu Karenga alijaaliwa kipaji cha muziki hususan upigaji wa gitaa la solo na uimbaji, kipaji ambacho kilimwezesha kufanya kazi katika bendi mbalimbali za muziki hapa nchini akianzia na Bendi ya Lake Tanganyika Jazz mwaka 1964, na baadaye Bendi Maarufu ya Tabora Jazz ikijulikana zaidi kama Wana Segere Matata.

“Nimeshtushwa, nimesikitishwa na kuhuzunishwa sana kutokana na taarifa za kifo cha Mwanamuziki huyu Mkongwe na Mahiri ambaye, kupitia kipaji alichojaaliwa na Mwenyezi Mungu, alitoa mchango mkubwa katika kuiletea sifa nchi yetu”, amesema Rais Kikwete katika Salamu zake za Rambirambi.

“Kutokana na msiba huu mkubwa, pokea salamu zangu za rambirambi kutoka dhati ya moyo wangu kwa kumpoteza mmoja wa Wasanii Mahiri katika Taifa letu, na kupitia kwako naomba salamu zangu ziwafikie wasanii kote nchini kwa kumpoteza mwenzao”, ameongeza kusema Rais Kikwete akiomboleza msiba huo.

Rais Kikwete ametoa salamu za pole kwa familia ya marehemu Karenga kwa kupoteza kiongozi na mhimili wa familia. Amewaomba wanafamilia wawe wavumilivu na watulivu wakati huu wanapopitia kipindi hiki kigumu cha kuondokewa na mpendwa wao, na anamuomba Mola aipokee na aiweke mahala pema peponi roho ya Marehemu Shem Ibrahim Karenga, Amina.

Imetolewa na:

Kurugenzi ya Mawasiliano ya Rais,

Ikulu – Dar es Salaam.

16 Desemba,2014