RAIS WA ZAMBIA EDGAR LUNGU NA AFANYA MKUTANO NA UJUMBE WA TANZANIA ULIOONGOZWA NA WAZIRI WA NISHATI NA MADINI, PROFESA MUHONGO JIJINI LUSAKA

Mohamed Saif, Zambia Waziri wa Nishati na Madini, Profesa Sospeter Muhongo ameongoza Ujumbe wa Tanzania  kuelekea nchini Zambia il...

Mohamed Saif, Zambia
Waziri wa Nishati na Madini, Profesa Sospeter Muhongo ameongoza Ujumbe wa Tanzania  kuelekea nchini Zambia ili kuanza  ziara ya kukagua njia nzima linapopita Bomba la Kusafirisha Mafuta ghafi  kutoka Tanzania hadi Zambia (TAZAMA) na Vituo vinavyotumika kusukuma mafuta hayo.
Ziara hiyo ya kutembelea Mkuza wa Bomba imeanza rasmi tarehe 27 Januari huko Ndola nchini Zambia na kumalizika tarehe 31 Januari, 2017ambapo itafanywa kwa ushirikiano wa Mawaziri wa Nishati kutoka Tanzania na Zambia wakiambatana na Makatibu wakuu, pamoja na viongozi waandamizi kutoka nchi zote mbili sambamba na uongozi wa TAZAMA.
Kufanyika kwa ziara hiyo kumetokana na makubaliano ya Marais wa nchi husika, Mhe. Dkt. John Pombe Magufuli na Mhe. Edgar Lungu ya Tarehe 28 Novemba, 2016 kuhusu kuboresha zaidi Bomba hilo la TAZAMA kwa manufaa ya nchi zote mbili.
Imeelezwa kuwa Ziara hiyo inafanyika kwa kufuata njia ya Mkuza kwa kupitia vituo vyote vinavyosukuma mafuta na baadaye kikao cha pamoja cha viongozi hao kitakachofanyika jijini Dar es Salaam.
Ziara hii imechagizwa pia na  ziara ya Rais Lungu  kwenye kituo cha  TAZAMA jijini Dar es Salaam ambapo ilielezwa kuwa ufanisi wa bomba hilo umeshuka ikilinganishwa na hapo hapo awali  kwani lilikuwa na  uwezo wa kusafirisha tani milioni 1.1 za mafuta kwa mwaka lakini kwa sasa linasafirisha tani 600,000 tu. 
Hivyo ili kuboresha miundombinu ya TAZAMA, nchi hizo zimekubaliana kushughulikia chanzo cha kuzorota kwa utendaji kazi wa TAZAMA ili Bomba hilo liweze kuendeshwa kwa faida kwa kunufaisha pande zote mbili.
Ziara  hiyo pia imelenga kufanya tathmini kwa kukagua Mkuza wa Bomba na maeneo yanayopendekezwa kujengwa bomba la kusafirisha Mafuta Safi (Finished Product) na Gesi Asilia kutoka Tanzania hadi Zambia kupitia njia ya Mkuza huo (way-leave) wa bomba la TAZAMA.
Bomba la kusafirisha mafuta ghafi la TAZAMA linaloanzia nchini Tanzania hadi mji wa Ndola nchini Zambia lina urefu wa kilomita 1,710 na kipenyo cha inchi 8 hadi 12 na lilianza kazi Mwaka 1968.

Waziri wa Nishati na Madini, Profesa Sospeter Muhongo (kulia) akijadiliana jambo na Balozi wa Tanzania Nchini Zambia, Balozi Grace Mujuma kabla ya kukutana na Rais wa Zambia, Mhe. Edgar Lungu  katika Ikulu ya Zambia hapo jana Tarehe 26 Januari.

Waziri wa Nishati wa Zambia, Mabumba David (kushoto) akijadiliana jambo na Katibu Mkuu wa Wizara ya Nishati ya Zambia, Brigedia Jenerali Emelda Chola kabla ya kuanza kwa mkutano wa Rais wa Zambia, Mhe. Edgar Lungu na Ujumbe kutoka Tanzania ulioongozwa na Waziri wa Nishati na Madini, Profesa Sospeter Muhongo (hayupo pichani).

 

Katibu Mkuu wa Wizara ya Nishati na Madini wa Tanzania, Profesa Justin Ntalikwa (kulia) na Ujumbe kutoka Tanzania walipokuwa wakisubiri kuanza kwa Mkutano wa Rais wa Zambia, Mhe. Edgar Lungu Ikulu, Jijini Lusaka, Zambia.

Rais wa Zambia, Mhe. Edgar Lungu (kushoto) akifurahia jambo na Waziri wa Nishati na Madini wa Tanzania, Profesa Sospeter Muhongo mara baada ya kumalizika kwa mkutano uliofanyikia Ikulu ya Zambia.

Rais wa Zambia, Mhe. Edgar Lungu (wa tatu kushoto mstari wa nyuma) katika picha ya pamoja na Ujumbe kutoka Tanzania na Baadhi ya Mawaziri wa nchini Zambia.

Rais wa Zambia, Mhe. Edgar Lungu (kushoto) akifurahia jambo na Waziri wa Nishati na Madini wa Tanzania, Profesa Sospeter Muhongo mara baada ya kumalizika kwa mkutano uliofanyikia Ikulu ya Zambia.

Rais wa Zambia, Mhe. Edgar Lungu (kushoto) akizungumza jambo Ikulu ya Zambia Jijini Lusaka mara baada ya kumaliza mkutano wake na Ujumbe kutoka Tanzania ulioongozwa na Waziri wa Nishati na Madini, Profesa Sospeter Muhongo (kushoto kwake). Kulia ni Balozi wa Tanzania Nchini Zambia, Balozi Grace Mujuma na Katibu Mkuu wa Wizara ya Nishati na Madini, Tanzania, Profesa Justin Ntalikwa.

Rais wa Zambia, Edgar Lungu (kulia) akizungumza wakati wa mkutano wake na Waziri wa Nishati na Madini wa Tanzania, Profesa Sospeter Muhongo (katikati). Mkutano huo ulijadili masuala mbalimbali mojawapo ikiwa ni uboreshaji wa Bomba la Mafuta Ghafi la TAZAMA. Kushoto ni Balozi wa Tanzania Nchini Zambia, Balozi Grace Mujuma.