BREAKING NEWS! MJUMBE WA TUME YA BARAZA LA KATIBA DK SENGONDO MVUNGI HATUNAYE TENA

Januari 28, 2013: Mjumbe wa Tume ya Mabadiliko ya Katiba, Dk Edmund Sengondo Mvungi (katikati) akibadilishana mawazo na Makamishina wa...

Januari 28, 2013: Mjumbe wa Tume ya Mabadiliko ya Katiba, Dk Edmund Sengondo Mvungi (katikati) akibadilishana mawazo na Makamishina wa Tume ya Pamoja ya Fedha (JFC), Dk Juma Ngasongwa (kulia) na Mhe. Othman Masoud, ambaye ni Mwanasheria Mkuu wa Serikali ya Mapinduzi Zanzibar (SMZ) mara baada ya JFC kuwasilisha maoni yao kuhusu Katiba Mpya wakati wa mkutano wao uliofanyika katika viwanja vya Karimjee jijini Dar es Salaam.

Jumatano Januari 9, 2013: Mjumbe wa Tume ya Mabadiliko ya Katiba, Dk. Edmund Mvungi (katikati) akizungumza na Viongozi wa Shirikisho la Vyama vya Wafanyakazi Nchini (TUCTA) waliofika katika Ofisi za Makao Makuu ya Tume Jijini Dar es Salaam kuwasilisha maoni yao kuhusu Katiba Mpya.

Na Mwandishi Wetu

Mjumbe wa Tume ya Mabadiliko ya Katiba aliyekuwa akipatiwa matibabu nchini Afrika Kusini amefariki dunia leo..

Kwa mujibu wa taarifa iliyotolewa na Katibu wa Tume ya Mabadiliko ya Katiba, Assaa Rashid leo jioni (Jumanne, Novemba 12, 2013), Dk Sendongo Mvungi majira ya saa 8:30 mchana kwa saa za Afrika ya Kusini akiwa katika Hospitali ya Milpark.

“Kwa masikitiko makubwa, Tume inawafahamisha wananchi kuwa Mjumbe wake, Dk Sengondo Mvungi aliyekuwa akipata matibabu katika Hospital ya Milpark iliyopo jijini Johannesburg nchini Afrika Kusini amefariki dunia leo (Jumanne, Novemba 12, 2013) saa 8:30 mchana kwa saa za Afrika ya Kusini,” amesema Rashid katika taarifa yake fupi ya awali na kuongeza:

“Taratibu za kuusafirisha mwili wa marehemu kutoka nchini Afrika Kusini kuja nchini kwa mazishi zinaendelea na taarifa zaidi zitatolewa kesho (Jumatano, Novemba 13, 2013),” ameongeza.

Marehemu Dk Mvungi alisafirishwa siku ya Alhamisi, Novemba 7, 2013 kwenda nchini Afrika Kusini kwa uchunguzi na matibabu zaidi akitokea Kitengo cha Mifupa Muhimbili (MOI) aliokuwa amelazwa baada ya kuvamiwa nyumbani kwake Kibamba, wilaya ya Kinondoni jijini Dar es Salaam na watu waliomjeruhi vibaya kichwani usiku wa kuamkia siku ya Jumapili, Novemba 3, 2013.

Katika taarifa yake, Tume pia imewaomba watanzania wote kuungana na familia, ndugu, jamaa na marafiki wa marehemu Dk Mvungi katika kuomboleza msiba huo.

Makamu wa Rais wa Jamhuri ya Muungano wa Tanzania, Dk Mohammed Gharib Bilal, akimsikiliza Dk Mugisha Clement, aliyekuwa akimpa maelezo kuhusu alivyompokea Mjumbe wa Tume ya Katiba, Dk Sengondo Mvungi, alipokuwa amelazwa katika Kitengo cha Uangalizi Maalum (ICU) MOI katika Hospitali ya Taifa Muhimbili, wakati alipokwenda kumjulia hali, kufuatia kujeruhiwa na majambazi usiku wa kuamkia Jumapili huko nyumbani kwake maeneo ya Kibamba. Kulia ni Mwenyekiti wa Chama cha NCCR-MAGEUZI, James Mbatia. (Picha na OMR)

Habari zilizotufikia zinasema kwamba Mjumbe wa Tume ya Mabadiliko ya Katiba, Dk Sengodo Mvungi amefariki katika hospitali ya MillPark huko Afrika ya kusini alkokuwa akipata matibabu majira ya saa 9.30 leo alasiri.

Dk Mvungi alijeruhiwa kwa kukatwa na mapanga kichwani Novemba 3 2013, mwaka huu nyumbani kwake Kibamba Msakuzi, nje kidogo ya jiji la Dar es Salaam na kulazwa Taasisi ya Mifupa ya Muhimbili (MOI) na baadaye kuhamishiwa Hospitali ya Milpark, Johannesbarg, Afrika Kusini kwa matibabu zaidi.

Katika tukio hilo watu wanaosadikiwa kuwa ni majambazi walimvamia Dk Mvungi na kumkatakata kwa mapanga hatimaye kumwibia fedha taslimu kiasi ambacho hakikutajwa, Komputa mpakato na simu za mkononi 2 na bastola.

Kamanda wa Polisi Kanda Maalum ya Dar es Salaam Suleiman Kova alisema wanawashikilia watuhumiwa kadhaa waliowakamata na misokoto 17 ya bangi, lita 15 za pombe ya gongo ambapo zoezi hilo limewashirikisha polisi na raia wema na kuakikisha watuhumiwa wote wanafikishwa kwenye vyombo vya sheria.

Kwa mujibu wa  Kamanda wa Polisi Kanda ya Kinondoni (RPC) Camilius Wambura, Dk Mvungi aliyekuwa Mhadhiri Mwandamizi wa Chuo Kikuu cha Bagamoyo (UB), alijeruhiwa vibaya sehemu za kichwani na kitu chenye ncha kali.

Kamanda Wambura alisema kuwa watu 6 wanasadikiwa kutekeleza  zoezi la uvunjaji wa nyumba ya Dk Mvungi, majira ya saa 7 za usiku wakidai awape fedha wakati alipokataa walimpiga na mapanga ambapao kati ya watu sita waliokuwepo nyumbani siku hiyo ni marahemu Dk Semvungi pekee aliyejeruhiwa. 

Kwa mujibu wa Mwenyekiti wa Tume ya Katiba Nchini Jaji mstaafu Joseph Warioba amethibitisha kufariki kwa Dk Sengondo mvungi mida ya saa 9.30 kwenye hospitali ya Milpark Afrika Kusini.

Taratibu za kuurejesha mwili wa Dk Mvungi zinaendelea kufanywa na ubalozi wa Tanzania nchini Afrika ya Kusini.

Mpaka sasa watu  9 wanashikiliwa na jeshi la polisi kwa tuhuma za kuhusika na tukio la mauwaji ya Dk huyo aliyeondoka wakati bado nguvu, maarifa, taaluma na mchango wake mkubwa ulikuwa unahitajika kwa Taifa letu.

Tutaendelea kuwajuza zaidi kuhusiana na msiba huo.

'Bwana ametwaa na jina lake lihimidiwe'