F Okandablogs
Siasa

Wednesday, June 13, 2018


Mtaalamu kutoka kitengo cha kuchangia Damu katika Hospitali ya Taaluma na Tiba (MAMC) akielezea faida za kuchangia damu na sifa za mtu anayetakiwa kuchangia damu kwa wafanyakazi ya Benki ya Mkombozi waliojitolea kuchangia damu katika kuadhimisha siku ya kuchangia damu duniani.
Wataalamu kutoka kitengo cha cha kuchangia Damu katika Hospitali ya Taaluma na Tiba (MAMC) wakiwa wanapima vipimo mbalimbali kwa wachangiaji kabla ya kuanza zoezi la kuchangia damu
Mkurugenzi Mtendaji wa Benki ya Mkombozi, Bw. George R. Shumbusho (kulia) akishiriki katika maadhimisho ya siku ya uchangiaji damu duniani.
Baadhi ya wafanyakazi wakisubiri kuchangia damu katika kuadhimbisha siku ya kuchangia damu duniani
Kwa Niaba ya Mkurugenzi mtendaji Bw.Antony Mnyambo akimkabidhi kitanda na mabox 20 (cooler boxes) kwa Mkuu wa kitengo cha kuchangia damu katika Hospitali ya Taaluma na Tiba (MAMC) Dkt. Ivan Nyamhanga kwa ajili ya kusaidia zoezi la uchangishaji damu.
Mkuu wa kitengo cha kuchangia damu katika Hospitali ya Taaluma na Tiba (MAMC) Dkt. Ivan Nyamhanga akipeana mkono na Mkurugenzi Mtendaji wa Mkombozi Benki baada ya kupokea vifaa vya kutumika wakati wa zoezi la uchangishaji damu.
Picha ya Pamoja ya wataalamu kutoka Kitengo cha Kuchangia Damu katika Hospitali ya Taaluma na Tiba (MAMC) wakati wa maadhimisho ya siku ya kuchangia damu duniani.

Na Mwandishi Wetu.

Hospitali ya Taaluma na Tiba ya Chuo Kikuu cha Afya na Sayansi Shirikishi, Muhimbili MAMC, Mloganzila imeanza maadhimisho ya siku ya kuchangia damu kwa kufanya zoezi la uchangishaji damu kwa wafanyakazi wa Mkombozi Commercial Bank, tawi la Msimbazi Center ili kukidhi mahitaji ya huduma hiyo kwa wagonjwa wanaohitaji.

Katika zoezi hili la uchangizaji damu Mkurugenzi Mtendaji wa benki ya Mkombozi Bw.George R. Shumbusho alitoa msaada wa kitanda kimoja kwa hospitali ya MAMC kwa ajili ya kusaidia wakati wa zoezi la utoaji damu kwa watu mbalimbali wanaojitolea na mabox 20 (cooler boxes) za kuhifadhia damu wakati wa kupeleka damu wodini kwa wagonjwa. Msaada huu wa vifaa unagharimu pesa ya kitanzania shilingi milioni moja na laki tano (1,500,000)

Akiongea wakati wa zoezi hilo Mkurugenzi Mtendaji Bw. Shumbusho “Kama taasisi ya benki kwa kuona umuhimu wa mahitaji ya damu ndiyo maana tumeadhimisha siku hii ya leo kwa kuwaamasisha wafanyakazi wetu wachangie damu ili tuweze kuokoa maisha ya watanzania na kutoa msaada ya vifaa vitakavyoweza kusaidia zoezi la uchangishaji damu”, alisema

Vile Vile aliwapongeza wafanyakazi waliojitokeza kuchangia damu, “Ni jambo la umuhimu mmefanya kwa ajili ya kuokoa maisha ya wagonjwa”, aliongeza.

Naye Mkuu wa kitengo cha kuchangia damu katika Hospitali ya Taaluma na Tiba MAMC, Mloganzila Dkt. Ivan Nyamhanga amewashukuru uongozi mzima wa Benki ya Mkombozi kwa kuhamasisha zoezi hili la kuchangia damu na pia kwa vifaa walivyotoa ambavyo vitasaidia wakati wa zoezi la uchangishaji damu.

Pia aliwashukuru wafanyakazi wote wa benki ya Mkombozi kwa kujitolea kuchangia damu kwa wahitaji. "Kama mnavyojua mahitaji ya damu ni makubwa hasa katika hospitali yetu ambayo bado ni changa na hivyo tunatoa shukrani zetu za dhati kwa kuhamasika kuchangia damu", alisema Dkt. Nyamhanga.

Zoezi hili la maadhimisho ya siku ya kuchangia damu lilifanyika katika Benki ya Mkombozi, tawi la Msimbazi center na vile vile baadhi ya maaskari kutoka SUMA JKT, Mloganzila waliweza kuchangia damu.


Wanafunzi kutoka Shule ya Msingi Mount Kibo ya Jijini Dar es Salaam wakiongozwa na Walimu wao wakiwa katika Majukwaa ya Wageni Bungeni kufuatilia Shughuli za Bunge la Jamhuri ya Muungano wa Tanzania namna linavyoendeshwa.


Wanafunzi kutoka Shule ya Msingi Angelico Lipani ya Jijini Arusha wakiongozwa na Walimu wao wakiwa katika Majukwaa ya Wageni Bungeni kufuatilia Shughuli za Bunge la Jamhuri ya Muungano wa Tanzania namna linavyoendeshwa.

Wanafunzi kutoka Shule ya Msingi Martin Luther ya Jijini Dodoma wakiongozwa na Walimu wao wakiwa katika Majukwaa ya Wageni Bungeni kufuatilia Shughuli za Bunge la Jamhuri ya Muungano wa Tanzania namna linavyoendeshwa. (PICHA NA BUNGE)


Na Veronica Kazimoto
Dodoma
13 Juni, 2018

Kamishna Mkuu wa Mamlaka ya Mapato Tanzania (TRA) Charles Kichere amewashukuru wafanyabiashara jijini Dodoma kwa mchango wao wa kulipa kodi na kuiwezesha Serikali kutekeleza wajibu wake wa kukuza uchumi na kutoa huduma mbalimbali za jamii hapa nchini.
Akizungumza wakati akifuturisha wafanyabiashara na wafanyakazi wa TRA katika ukumbi wa LAPF jijini hapa, Kichere alisifia uhusiano mzuri uliopo kati ya wafanyabiashara hao na ofisi ya TRA Mkoa wa Dodoma.
"Nachukua nafasi hii kuwashukuru wafanyabiashara wa Dodoma kwa kuwa walipakodi wazuri na kuonyesha ushirikiano wa hali ya juu na ofisi yetu ya TRA hapa mkoani Dodoma ambapo kutokana na uhusiano huu uliopo, tunapata urahisi wa kutekeleza jukumu letu la kukusanya mapato ya Serikali kwa manufaa ya watanzania wote," alisema Kichere.
Kichere amewaahidi wafanyabiashara hao kuwa, TRA itaendelea kudumisha ushirikiano huo na kukaribisha mazungumzo ya pamoja na viongozi wa TRA mkoani hapa ili kufikia muafaka wa masuala mbalimbali yanayohusu kodi badala ya kulalamika mitaani bila kupata suluhisho.
Aidha, Kamishna Mkuu Kichere amewahimiza wafanyabiashara hao kuendelea kulipa kodi mbalimbali kwa wakati kwani kodi hizo hutumika katika kujenga uchumi wa nchi na kutoa huduma mbalimbali za jamii ikiwa ni pamoja na huduma za afya, maji safi na salama, elimu, kulipa mishahara ya watumishi wa Umma, miundombinu ya barabara na umeme.
"Nachukua fursa hii kutoa rai kwenu wafanyabiashara kuendelea kulipa kodi zote kwa wakati ikiwa ni pamoja na Kodi ya Majengo na  Kodi ya Mapato awamu ya pili ambapo mwisho wa kulipa kodi hizi ni tarehe 30 Juni, mwaka huu. Kodi nyingine ni Kodi ya Ongezeko la Thamani (VAT) ambayo hulipwa tarehe 20 ya kila mwezi.  Hivyo, uhiari wenu wa kulipa kodi hizi kwa wakati ndio chachu ya kujenga uchumi wetu na kuharakisha kutoa huduma za jamii kwa watanzania wote", alisema Kichere.
Naye Katibu Mtendaji wa Chemba ya Biashara, Viwanda na Kilimo (TCCIA) mkoani Dodoma ambaye pia ni Katibu wa Sekta Binafsi mkoani hapa Idd Senge amesema kwamba, sekta binafsi itaendelea kushirikiana na TRA kwa ajili ya kuhakikisha kuwa wafanyabiashara wanalipa kodi kwa wakati ili kuepuka faini ambazo zinarudisha nyuma maendeleo ya biashara zao.
"Sisi kama wafanyabiashara wa hapa mkoani Dodoma tutaendelea kushirikiana na Mamlaka ya Mapato Tanzania na pale patakapotokea sintofahamu yoyote tutafanya mawasiliano na viongozi wa TRA ili kupata muafaka wa pamoja," alieleza Senge.
Mamlaka ya Mapato Tanzania imejiwekea utaratibu wa kufuturisha wafanyabiashara na wafanyakazi wake kila ifikapo Mwezi Mtukufu wa Ramadhani kwa lengo la kumshukuru Mwenyezi Mungu katika shughuli mbalimbali wanazozifanya hususani za ukusanyaji mapato ya Serikali.

Kamishna Mkuu wa Mamlaka ya Mapato Tanzania (TRA), Bw. Charles Kichere akitoa hotuba fupi kwa Wafanyabiashara wa Jijini Dodoma wakati wa hafla fupi ya Iftar aliyowaandalia wafanyabiashara hao ikiwa ni sehemu ya kuwathamini walipakodi  nchini.


Kamishna wa Mamlaka ya Mapato Tanzania (TRA), Bw. Charles Kichere (aliyevaa miwani) akiwekewa futari wakati wa hafla fupi ya Iftar aliyowaandalia wafanyabiashara wa Jijini Dodoma ikiwa ni sehemu ya kuwathamini walipakodi  nchini.

Baadhi ya Wafanyabiashara wa Jijini Dodoma wakichukua futari wakati wa hafla fupi ya Iftar iliyoandaliwa na Kamishna Mkuu wa Mamlaka ya Mapato Tanzania (TRA), Bw. Charles Kichere kwa wafanyabiashara hao ikiwa ni sehemu ya kuwathamini walipakodi nchini.

Kamishna Mkuu wa Mamlaka ya Mapato Tanzania (TRA), Bw. Charles Kichere (aliyevaa kofia kulia) akiwa na baadhi ya wafanyabiashara na watumishi wa TRA wakifuturu wakati wa hafla fupi ya Iftar iliyoandaliwa na Kamishna Mkuu huyo ikiwa ni sehemu ya kuwathamini walipakodi  nchini.


Baadhi ya watumishi wa Mamlaka ya Mapato Tanzania (TRA), wakiwa katika hafla fupi ya Iftar jijini Dododma aliyoiandaa Kamishna Mkuu wa Mamlaka hiyo Bw. Charles Kichere ikiwa ni sehemu ya kuwathamini walipakodi  nchini.


Kamishna Mkuu wa Mamlaka ya Mapato Tanzania (TRA), Bw. Charles Kichere (wa nne kulia) akiwa katika picha ya pamoja na baadhi ya wafanyabiashara na watoto yatima wa Kituo cha kulelea watoto yatima cha  Rahman kilichopo jijini Dodoma wakati wa hafla fupi ya Iftar aliyowaandalia wafanyabiashara na watumishi wa TRA ikiwa ni sehemu ya kuwathamini walipakodi  nchini. Hafla hiyo ilifanyika katika Ukumbi la LAPF jijini Dodoma.

Kamishna Mkuu wa Mamlaka ya Mapato Tanzania (TRA), Bw. Charles Kichere (katikati) akiwa katika picha ya pamoja na baadhi ya wafanyabiashara na watumishi wa TRA mara baada ya hafla ya Iftar aliyowaandalia wafanyabiashara hao ikiwa ni sehemu ya kuwathamini walipakodi  nchini. Hafla hiyo ilifanyika katika Ukumbi la LAPF jijini Dodoma.
(PICHA ZOTE NA TRA)







Chama Cha Mapinduzi (CCM) kimeombwa kuwa mwenyeji wa Mkutano wa kidunia wa viongozi wa vyama vya kisiasa, maombi haya yamewasilishwa na Balozi wa China nchini Tanzania Bi. Wang Ke alipotembelea Ofisi Ndogo ya Makao Makuu ya CCM Lumumba kuonana na Ndg. Bashiru Ally Kakurwa, Katibu Mkuu wa Chama Cha Mapinduzi (CCM).
Balozi Wang Ke amefika Ofisi Ndogo za CCM kumletea Ndg. Bashiru Kakurwa ujumbe wa salamu za pongezi kwa kuteuliwa na Ndg. John Pombe Joseph Magufuli, Mwenyekiti wa CCM na kwa kauli moja kuchaguliwa na Halmashauri Kuu ya Taifa (NEC) kuwa Katibu Mkuu wa CCM.

Katika salamu zake Balozi Wang Ke ameeleza China na Chama Cha Kikomunisti cha China (CPC) kinampongeza Ndg. Bashiru na kwamba wako tayari kushirikiana naye katika masuala mbalimbali kama sehemu ya mahusiano ya muda mrefu kati ya Tanzania na China na vyama vya CCM na CPC. Aidha, Balozi Wang ametumia mkutano huo kuwasilisha ombi la China kwa Chama Cha Mapinduzi kuwa mwenyeji wa Mkutano wa Kidunia wa Viongozi wa Vyama vya Siasa ambao kwa mara ya kwanza unafanyika barani Afrika na unaotarajiwa kufanyika mwezi wa Julai 2018.
Chama Cha Kikomunisti cha China (CPC) kimeichagua Tanzania na Chama Cha Mapinduzi (CCM) kuwa mwenyeji wa mkutano huu mkubwa na wa kihistoria "CPC Dialogue with World Political Leaders in Africa". Mkutano huu wa kidunia unabeba kauli mbiu isemayo nadharia na vitendo katika kutambua njia sahihi za maendeleo ambazo ni endelevu na halisia kwa nchi zetu. Tunayo furaha na heshima kubwa kuwa na mkutano huu mkubwa Afrika na Tanzania kama sehemu ya Mpango wa kuiunganisha dunia kwa barabara na usafiri wa maji ulioasisiwa na Ndg. Xi Jinping Katibu Mkuu wa CPC na Rais wa China amesema Bi. Wang Ke.

Akipokea salamu hizo za pongezi Ndg. Bashiru Ally amemhakikishia Balozi Wang kwamba Chama Cha Mapinduzi kitaendeleza mahusiano ya kidugu na ya kihistoria kati ya CCM na CPC na nchi zetu mbili.
Tunataka kujifunza zaidi kutoka China na hasa namna ya kujipanga kimkakati katika kushughulika na kuendeleza mapambano dhidi ya dhuluma na unyonyaji ili nchi yetu iinuke na kuleta manufaa makubwa kwa watu wetu wa Tanzania. Ndg. John Pombe Joseph Magufuli, Mwenyekiti wa CCM na Rais wa Jamhuri ya Muungano wa Tanzania anayo kazi ya kujenga uchumi utakaowezesha kujitegemea, uchumi wa kitaifa, uchumi utakaowaondoa watanzania kutoka katika maisha ya umasikini kama China na kwa msingi huu kama Chama na Ilani tumejitambulisha kuhudumia wanyonge na kushughulika na shida za watu amesema Ndg. Bashiru Ally Kakurwa Katibu Mkuu wa CCM

Huu ni mwendelezo wa Chama Cha Mapinduzi (CCM) kuimarisha mahusiano ya ndani na ya nje katika eneo la siasa, diplomasia na uchumi.

Imetolewa na,

IDARA YA ITIKADI NA UENEZI
CHAMA CHA MAPINDUZI (CCM)
OND LUMUMBA